Joh 6 | KYG | STEP | Henaga'amo Yesu'a ani kotu'mo agi'amo Galeliya ani kotu'mo lakaeno mugagayaga faligamo u'niye. Ani ani kotu'mo alu agi'amo Taipiliyasi ani kotu'mae.

John 6

Yesu'a ne'ya'mo alino faefu tauseni'a vaya'mo apami'niya gemae

(Mt 14:13-21; Mk 6:30-44; Lu 9:10-17)

1 Henaga'amo Yesu'a ani kotu'mo agi'amo Galeliya ani kotu'mo lakaeno mugagayaga faligamo u'niye. Ani ani kotu'mo alu agi'amo Taipiliyasi ani kotu'mae. 2 Agaemo alagena kava'mo huno kaita hapau'niya vaya'aina alino hapageno apate'nige'a age'naya'mofe'mo asole vaya'mo akame hu'a u'nae. 3 Yesu'e ge'amo ne'afiya vaya'e'mo mago aise avefi'mo hai'a mai'nae. 4 Pasova hopa afina'mo ago alagi eno hogo hu'niye. 5 Yesu'a alino maku huno apakeyana asole vaya'mo agaetegamo ne'ageno apaketeno Filipife'mo, mani asole vaya'mo ne'agi ne'ya'mo nesaya ya'mo haiyateti'mo miya faigune, huno afi ge'niye. 6 Agai'amo ani hisiya kava'mo ago age'niyana Filipife'mo na agufa gemo hisifi, huno avataga huno afi ge'niye. 7 Filipi'a, tu hataleti kinaleti'mo ne'ya'mo miya faigunana mani asole vaya'mogi nesaya kava'mo osugiye, huno ha pai'niye. 8 Mago vekamo ge'amo ne'afiya vekamo agi'amo E'nalu'a Saimoni Pita agana'amo'a, 9 mago manile mai'niya mafa'nemo'a faefu'a mali peleti maya'e lole noyamela'e'mo ali'niye. Ali'niya'monanafa asole vayapi'mogeno mani ne'ya'atomo'a kanale osugiye, huno ha pai'niye. 10 Yesu'a, etapa kahaule'mo itopale'mo maiyo, huta hapa paiyo, huno hapa pai'nige'apae'mo muki vaya'aife'mo hapa pai'nage'a kahaule'mo e'a itopale'mo mai'nae. Ani vaya'mo faefu tauseni'a vaya'mo mai'nae. 11 Yesu'a peleti mayamo ali'neno Gotife'mo hao ke heteno mai'naya vaya'mo alino fako huno apamiteno noyame'e'mo ani kava huno alino apakai'apimo hapau'niya agufa kava'mo huno apami'nige'a ali'a ne'nae. 12 Ne'ya'mo ne'a apamu hutageno'ae'mo Yesu'a ge'amo ne'afiya vaya'aife'mo, fiku yanageno ne'ya atupa'amo lageso hugiyanagi alita anupa hiyo, huno hapa pai'nige'a 13 faefu'a peleti mayafati'mo ne'a apamu hute'a atale'naya atupamo ali'a tuolofu'a honafa yuvapafi'mo male'a havai te'nae. 14 Apakaemo age'nayana Yesu'a no'agaya agufa aune kava'mo huno alino apave li'nige'a agete'apae'mo, Gotitegati gemo alinineno aeno hakalo huno hapa paisiya vekamo ma mopafi'mo afole aigiye, hu'a hu'naya vekamo agaeke'mae, hu'a hu'nae. 15 Ani vaya'mogimo e'a Yesu'mo atafau'a yagaino apatesiya kini vekamo ali'a hamale'a atesayafe'mo hu'nageno Yesu'a apake'niya'mofe'mo apataleno agai'age'mo avefi'mo uno hai'niye.

Yesu'a ani agotofule'mo e'niya gemae

(Mt 14:22-33; Mk 6:45-52)

16 Yegemo lamino fale'nige'apae'mo Yesu ge'amo ne'afiya vaya'mo ani kotutegamo lami'a sipifi'mo hai'a maite'a mugagayaga faliga Kapeneyamu taonifilagamo ani'mo lakae'a visayafe'mo ne'vageno'ae'mo hani hu'niyana Yesu'a apakaetegamo o'me'niye. 18 Lusi kava huno yasimo alinineno ani'mo aino holakau holakau hu'nige'apae'mo 19 apakaemo latapa kayoteti'mo ani'mo avale'a ataleme ataleme aise afagi'ale'mo ne'u'apae'mo agayana Yesu'a ani agotofule'mo sipi haopale'mo e'nige'a agete'apae'mo koli nehageno'ae'mo 20 Yesu'a, nagaemo ne'ovanagi koli osiyo, huno hapa pai'nige'apae'mo 21 hapau'nige'a sipifi'mo avale'a atete'apae'mo malage hu'a u'a ani agi'nale'mo ava'yi hu'nae.

Yesufe'mo kahauya hu'naya gemae

22 Ega'amo mugagayaga faliga vaya'mogi agayana egamo hane'nige'a age'naya sipige'mo magoke'age'mo hane'nigeno Yesu'a ani sipifi'mo o'u'nige'a ge'amo ne'afiya vaya'age'mo u'nage'apa apake'nae. 23 Mago'e sipimo Taipiliyasi kotegati'mo e'a Yesu'a ne'ya'mo alino Gotife'mo hao ke heteno apami'nige'a ne'nayategamo e'nae. 24 Asole vaya'mogi apakayana Yesu'e ge'amo ne'afiya vaya'e'mo anile'mo o'mai'nage'a apakete'apae'mo mago sipigopi'mo u'a hai'a maite'a Yesufe'mo kahauya hu'a agesayafe'mo ani'mo lakae'a u'nae.

Yesu'a afa'a maisaya ya'mo alino ne'apamiya peleti mayagana huno mai'niya gemae

25 Ani kotu'mo mugagaya faligamo lakae'u'a ava'yi hute'a Yesu'mo mai'nige'a agete'apae'mo, Tisao, hu'a, hainu afina'mo manile'mo eka mai'nane, hu'a afi ge'nageno'ae'mo 26 Yesu'a, alagi lama ge lapa nepauve, huno, no'agaya agufa aune kava'mo agetapa aeto hu'naya'mofe'mo nagesayafe'mo o'me'nafa peleti mayamo ali'na lapami'nogetapa netapa lapamu hu'naya'mofe'mo nagesayafe'mo e'nae. 27 Lapakaemo kasalisiya ne'ya'mo alisayafeke'mo ali'ya'mo o'alitapa hanege hanege huno hanesiya ne'ya'mo alino lapamisigetapa alagepa hutapa maige maige hutapa maisaya ya'mo alisayafeke'mo ali'ya'mo aliyo. Vemo Mafa'nemo'a ani agufa ne'ya'mo alino lapamigiye. Muki ya'mo Afo'amo'mo Goti'a lekana pai'na ate'nove, huno alino apave lisiyafe'mo himamu'amo alino ami'niye, huno hapa pai'nige'apae'mo, 28 Goti'a hau'niya kava'mo hisunafe'mo na agufa ali'ya na agufa ali'ya'amo aligune, hu'a afi ge'nageno'ae'mo, 29 Goti'a hau'niya kava'mo magoke'age'mo hane'niyana alino ate'nigeno emine'niya vekae'mo lapakesa afitapa fatago hisaya kavake'mo ali'ya'amo hane'niye, huno hapa pai'nige'apae'mo, 30 Lama ge nehane, huta hisunafe'mo haiya agufa no'agona kaune kava'mo huka alika lave ligane. Na kava hugane. 31 Laginago vaya'mogi ka'me kotega mana ne'ya'mo ne'nae. Ani kavatefe'mo Goti mukufi gemo'mo, agaemo koku'napati'mo peleti mayamo alino apami'nige'a ne'nae, huno hu'niye, hu'a ha pai'nageno'ae'mo 32 Alagi lama ge lapa nepauve, Mosese'a koku'napati lama ge peleti mayamo alino o'apami'nifa Afo'nimoke'mo koku'napati'mo lama ge peleti mayamo alino nelapamiye. 33 Goti'a alino ne'apamiya peleti mayamo koku'napati'mo emineno ma mopafi vaya'mo afa'a maisaya ya'mo alino ne'apamiya vekamo mai'niye, huno hapa pai'nige'apae'mo, 34 Ala kava nene, muki afina'mo ani peleti mayamo alika lamigeta neno, hu'a ha pai'nageno'ae'mo, 35 nagaemo afa'a maisaya ya'mo alino ne'apamiya peleti mayagana hu'na mai'nove. Nagaetegamo esaya vaya'mo apaka otegaiye. Nagaefe'mo apakesa afi'a fatago nehisaya vaya'mo anife'mo alagi ohapaugiye. 36 Ago lapa pai'nae'mo, nage'naya'monanafa lapakesa afitapa fatago nosae, hu'na ago lapa pai'nove. 37 Muki vaya'amo muki ya'mo Afo'amo'mo apavaleno namisiya vaya'mo nagaetegamo egae. Nagaetegamo e'a mai'nisaya vaya'mo ali'na hapafai'na o'apatalegauve. 38 Ani kavatefe'mo nagai'ni nahau'nisiya kava'mo hisuvafe'mo emi'no'me'nofa alino nate'nige'na emi'ne'nova vekamo'a hau'niya kava'mo hisuvafe'mo emi'ne'nove. 39 Muki ya'mo Afo'amo'mo alino nate'nige'na emi'ne'nova vekamo'a hau'niyanage'na muki apavaleno nami'niya vayapati'mo magoke vekamo alagi ali'na apahe'na atalesugeno lageso hisiyafe'mo ohau'niyanage'na ma mopamo hano hisiya afina'mo muki vaya'amo ali'na he ti'na apatesuvafeke'mo hau'niye. 40 Alino nate'nige'na emi'ne'nova vekamo'a hau'niyanage'a Mafa'ne'amo age'a aeto hute'apae'mo muki vaya'amogi agaefe'mo apakesa afi'a fatago nehisaya vaya'mo afa'a maige maige hu'a maisaya ya'mo aligae. Ali'nisage'na ma mopamo hano hisiya afina'mo ali'na he ti'na apategauve, huno hapa pai'niye.

41 Yesu'a, koku'napati'mo emi'ne'niya peleti mayagana hu'na mai'nove, huno hapa pai'niya'mofe'mo aepa fai'a hagalu hagalu hu'a ge hau'nae. 42 Ge hau'apae'mo, ani kanomo Yesu'a Yosefe mafa'ne'amo o'mai'nifiye. He, ani kanomo mai'nigeta ita'afo'ala'moganimo ago anake'none. Na kava higeno'ae'mo, nagaemo koku'napati emi'ne'nove, huno nehiye, hu'a hute'a hu'a faipa hu'a atete'a ge hau'nae. 43 Yesu'a ge'apile'mo aeno atagaina huno hapa paino'ae'mo, lapakaitapimo hagalu hagalu gemo osiyo. 44 Magoke vekamo'mo agai'amo nagaetegamo afa'a o'megaiya'monanafa Afo'nimo'mo alino nate'nige'na emi'ne'nova vekamoke'mo ayate heno avayu hulino esigeno'aeke'mo nagaetegamo egaiye. Nagaetegamo esige'nae'mo ma mopamo hano hisiya afina'mo ali'na he ti'na ategauve. 45 Gotitegati gemo alini e'a ae'a hakalo hu'a hapa nepaiya vaya'mogimo Goti mukufi'mo avo'mo kae'apae'mo,Goti'a muki vaya'aina alino apaya malegaiye, hu'a avo'mo kae male'nae. Ani gemo hu'naya'mofe'mo muki ya'mo Afo'amo'mo hu'niya gemo afite'a age'naya vaya'mo muki'amo nagaetegamo ete ete hu'a ne'ae. 46 Ani gemo huva'monanafa magoke vekamo'a Afo'nimo'mo o'age'niye. Gotitegati'mo magoke vekamo emine'niya vekamoke'mo muki ya'mo Afo'amo'mo age'niye. 47 Alagi lama ge lapa nepauve, Apakesa afi'a fatago nehaya vaya'mo afa'a maige maige hu'a maisaya ya'mo ago ali'nae. 48 Nagaemo afa'a maisaya ya'mo alino ne'apamiya peleti mayagana hu'na mai'nove. 49 Lapakinago vaya'mogi mana peleti mayamo ka'me kotega mai'ne'apae'mo ali'a ne'naya'monanafa ago fali'nae. 50 Koku'napati emine'niya peleti mayamo aeto agufa kanale peleti mayamo hane'niyanage'a ali'a ne'nisaya vaya'mo alagi ofaligae. 51 Nagaemo afa'a maisaya ya'mo alino ne'apamiya peleti mayamo koku'napati'mo emine'niya peleti mayagana hu'na mai'nove. Ina lagimo ani peleti mayamo ali'a ne'nisafige'a muki afina'mo afa'a maige maige hu'a maigae. Ali'na apamisuva peleti mayamo nagufafati name'animo hane'niye. Ma mopafi vaya'mo afa'a maige maige hu'a maisayafe'mo name'animo ali'na apamiguve, huno hapa pai'niye. 52 Hapa pai'nige'a afite'apae'mo apakai'apimo ge vaite'apae'mo, Ani vekamo ame'amo nesunafe'mo haiya kava huno alino lamigiye, hu'a hu'nae. 53 Yesu'a, alagi lama ge lapa nepauve, lapakaemo Vemo Mafa'nemo ame'a'e kola'a'e'mo alitapa o'ne'nisayana afa'a maisaya ya'mo alagi o'ali'nae. 54 Ina lagimo name'ni'e kola'ni'e'mo ali'a ne'nisafige'a afa'a maige maige hu'a maisaya ya'mo ago ali'nayanage'na ma mopamo hano hisiya afina'mo ali'na he ti'na apategauve. 55 Name'animo lama ge ne'ya'mo hane'nigeno kola'nimo lama ge ani'mo hane'niye. 56 Ina lagimo name'ni'e kola'ni'e'mo ali'a ne'nisafige'a nagaepi'mo mai'nage'na apakaepi'e'mo mai'nove. 57 Muki ya'mo Afo'amo'mo afa'a maisaya ya'mo aepa vekamo'a alino nate'nige'na emine'nove. Agaemo afa'a maisuva ya'mo aepa vekamo mai'nige'na nagufafati name'animo ne'naya vaya'mo afa'a maisaya ya'mo aepa veka'apimo mai'nove. 58 Manimona koku'napati'mo emine'niya peleti mayamo hane'niye. Lapakinago vaya'mogi ne'naya peleti mayagana huno ohane'nifa aeto agufa kanale peleti mayamo hane'niye. Lapakinago vaya'mogi ali'a nete'apae'mo ago fali'naya'monanafa mani peleti mayamo ne'nisaya vaya'mo muki afina'mo afa'a maige maige hu'a maigae. 59 Yesu'a mani gemo Kapeneyamu taonifi'mo mono nopi'mo alino apaya male'niye.

Ge'amo ne'afiya vayapati'mo mago vaya'amo ago atale'a u'naya gemae

60 Asole vaya'mo ge'amo ne'afiya vayapati'mo mago vaya'amo ani gemo afite'apae'mo, mani gemo'mo kana hu'niya'mofe'mo ina lagimo ani gemo afi'a aeto hugae, hu'a hu'nae. 61 Yesu'a agai'a aipafi'mo agesa afino'ae'mo ge'nimo ne'afiya vaya'mogi hu'nova gee'mo hagalu hagalu gemo nehae, huno apaketeno'ae'mo, mani gemo'mo ane'aifi'mo hegekana huno nelapatafaifiye. 62 Agesayana Vemo Mafa'nemo aino atagi neno haino maisigetapae'mo, na agufa yane hutapa lapakesa afigae. 63 Naune'name'mo'a afa'a maisaya ya'mo alino ne'apamiye. Nagufafati name'amo'mo lapa o'maegaiye. Lapa nepauva gefi'mo auneme'mo hane'neno afa'a maisaya ya'mo alino ne'apamiya gemo hane'niye. 64 Hane'niya'monanafa lapakaepati'mo mago vaya'mo apakesa afi'apa fatago nosae, huno hapa pai'niye. Yesu'a ali'ya'amo aepa faino ali'niya afinateti'mo apakesa afi'a fatago osisaya vaya'e kutulu ya'mo alisiya veka'e'mo ago apake'niye. 65 Huno hapa paiteno'ae'mo, ani kavatefe'mo, mago vekamo'a nagaetegamo agai'amo afa'a o'megaiya'monanafa Afo'nimo'a fiku ha maeno amisigeno egaiye, hu'na ago lapa pai'nove, huno hapa pai'niye.

66 Ani gemo huno hapa pai'niya'mofe'mo asole vaya'mo ge'amo afi'naya vayapati'mo agae'e'mo mago'e hu'a lokae'a umenitata osu'a ago atale'a u'e'a hu'nae. 67 Atale'a u'nageno'ae'mo Yesu'a tuolofu'a vaya'mo ge'amo ne'afiya vaya'aife'mo, lapakae'e'mo nataletapa ugefe nehafiye, huno apafi ge'nigeno'ae'mo 68 Saimoni Pita'a, Ala kava nene, huno, ina lategamo ugune. Kagae gemo'a afa'a maisaya ya'mo alino ne'apamiya gemo hane'niye. 69 Hemenimo lagaemo lagesa afita fatago huteta kage'nonana aeto agufa vekamo Gotitegati'mo emike'nana vekamo mai'nanageta kage'none, huno ha pai'nigeno 70 Yesu'a, nagaemo lekana pai'na lapate'nova'monanafa lapakaepati'mo mago vekamo aipafi'mo hosu aune vekamo mai'niye, huno hapa pai'niye. 71 Agaemo Yutasi'a Isakaliyoti kotega vekamo Saimoni mafa'ne'ae'mo hu'niye. Yutasi'a ani tuolofu'a vayapati vekamo'a kutulu ya'mo aliteno Yesu'mo avaleno apamisige'a amagisaya vekamo mai'niye.